Bu gün Beynəlxalq Fotoqrafiya Günü qeyd olunur. Tariximizdə ilk azərbaycanlı fotoqraf kimi tanınan şəxs isə Mircavad Seyidhəsənoğlu Axundzadədir.

Mircavad Axundzadə 1909-cu ildə Bakının Maştağa qəsəbəsində anadan olub. Uşaqlıqdan fotoya böyük maraq göstərib və tez-tez şəhərdə mətbəədə çalışan atasının yanına gedərmiş. Burada çalışan Lifşits soyadlı alman onun marağını görərək Mircavada fotoaparat hədiyyə edib. Beləliklə, o, hələ 9 yaşında ikən (1918-ci ildə) ermənilərə qarşı vuruşan bir qrup silahlı maştağalının şəklini çəkib.

Elə həmin il – 1918-ci ilin mart soyqırımları zamanı – Mircavad öz kiçik fotoaparatı ilə baş verən faciələri lentə alaraq, tarixə ilk azərbaycanlı fotoqraf kimi düşüb. Mircavad Axundzadə 1996-cı ildə Bakıda vəfat edib. Təəssüf ki, vəfatından sonra onun yaşadığı ev satıldıqda şəxsi arxivi orada qalıb və itib.