Aydın Mehdiyevin İtaliyada, Palazzo Mandrilli Qalereyası tərəfindən təşkil olunmuş fərdi sərgisi.

Azərbaycanın landşaftlarında təbiət insan əli ilə deyil, zamanın, küləyin və yerin dərin yaddaşının formalaşdırdığı xüsusi, demək olar ki, səssiz bir dili üzə çıxarır. "Azərbaycanın Daş Keşikçiləri" sərgisi tamaşaçını təbii formalarla düşüncəli bir dialoqa dəvət edir; bu formalar öz quruluşunda mələksi siluetləri, qoruyucuları və maddi olmayan varlıqları xatırladır.

Bu obrazlar insan tərəfindən yaradılmayıb, lakin sanki gizli bir niyyət daşıyan daxili ifadəliliyə ma­likdir. Onlar təbii reallıqla insan təxəyyülünün kə­sişdiyi məkanlarda əsrlərin şahidi kimi çıxış edir və tamaşaçını gördüyünün həmmüəllifinə çevirir.

Layihə pareidoliya fenomeninə, insanın abstrakt formalarda tanış obrazları görmək meylinə müra­ciət edir və bununla yanaşı, insanın dünyada məna və mənəvi varlıq hissi axtarma ehtiyacını ortaya qoyur.

Layihəyə xüsusi dərinlik verən, təbiətdə gizli ob­razları görərək onları metafizik vizual təcrübəyə çevirən görkəmli fotoqraf Aydın Mehdiyevdir. Onun işləri sənədləşdirmə ilə interpretasiya ara­sında tarazlıq yaradır və landşaftı vizual bir kəşfə çevirir.

Onun obyektivində təbiət fon olmaqdan çıxaraq "danışmağa" başlayır və geoloji ilə mifoloji, real ilə simvolik arasında körpü quran müstəqil obraz yaradıcısına çevrilir.

Nəticədə "Azərbaycanın Daş Keşikçiləri" yalnız landşaftın təsviri deyil, həm də sakralı axtarmağa dəvətdir: bu formalar sadəcə təxəyyülün oyunu, yoxsa gizli bir reallığın səssiz şahidləridir?

Sərgi haqqında daha ətraflı - https://shorturl.az/jNLQj

Amira Süleyman
Azərbaycan Fotoqrafları Birliyinin sədri

Aydın Mehdiyev - texnika elmləri doktoru, gömrük xidməti polkovniki və IAAP (International Associ- ation of Art Photographers) təşkilatının 2025-ci ilin aprelində "Titan" dərəcəsinə layiq görülmüş tanınmış fotoqraf, Azərbaycan Fotoqrafları Birliyinin İdarə heyətinin üzvüdür.

O, 1959-cu ildə Bakıda anadan olub.1985-ci ildə Azərbaycan Mühəndis-İnşaat İnstitutunu fərqlən­mə diplomu ilə bitirib. Daha sonra fizika-riyaziy­yat elmləri namizədi və texnika elmləri doktoru elmi dərəcələrinə nail olub. Hal-hazırda Azərbay­can Memarlıq və İnşaat Universitetinin Mexanika kafedrasında professor kimi pedaqoji fəaliyyət göstərir.

Fotoqrafiyaya marağı 9 yaşından başlasa da, sənət yönümlü fəaliyyətə 2003-cü ildən ciddi şə­kildə başlayıb. 2007-ci ildən etibarən yerli və bey­nəlxalq sərgilərdə iştirak edir:

• 2009-cu ildən Azərbaycan Fotoqrafları Birliyinin ( AFB ) üzvüdür
• 2011 - "Dövlət qulluğunda fərqlənməyə görə" medalı
• 2012 - Azərbaycan Respublikasının Dövlət Gömrük Komitəsinin "20 illik yubiley" medalı
• 2012 - B.N. Yeltsin Prezident Kitabxanasının "Rusiya əcnəbinin gözü ilə" fotomüsabiqəsində" müasir texnologiyalar " nominasiyasında – 1-ci yer
• BP "Azərbaycan obyektivdə" fotomüsabiqəsində 5 fotodan 3-ü kataloqa daxil edilib
• 2016 - "Fəxri mədəniyyət işçisi" döş nişanı
• "Leica" şirkətinin " I shot it" beynəlxalq fotomüsabiqələrində 7 dəfə "Mark of Excellence" mükafatı
• 2022 - Azərbaycan Fotoqrafları Birliyinin İdarə heyətinin üzvü
• 2023 - EDFOD (Edremit Photography and Cinema Art Association) tərəfindən "Certificate of Excellence" mükafatı
• 2024 - COP29 çərçivəsində ekoloji mövzularda "Həyatın rəngləri gördüyüm kimi", "Təbiətə dost ol" və "Sehrli Ordubad" adlı üç fərdi sərgi təqdim edib.

Beynəlxalq uğurları sırasında FIAP, IAAP, PSA və GPU himayəsi ilə keçirilən müsabiqələrdə 4 qızıl, 6 gümüş, 9 bürünc medal, 20-dən çox diplom və 150-dən artıq sertifikat var. ABŞ-ın ViewBug plat­formasında son 5 ildə ən güclü fotoqraflarının ilk onluğuna daxil olub. Rusiyanın 35AWARDS müsa­biqəsində isə 15-dən çox diplomla təltif edilib.