Azərbaycan Fotoqrafları Birliyi (AFB) – ictimai, yaradıcı və qeyri-kommersiya təşkilatıdır. Birlik öz fəaliyyətini açıq cəmiyyət, könüllülük və özünüidarə prinsipləri əsasında quraraq, peşəkar və həvəskar fotoqrafları bir araya gətirir. AFB-nin əsas məqsədi fotoqrafiya sənətinin inkişafına dəstək vermək, vizual mədəniyyəti təşviq etmək və fotoqraflar üçün yaradıcı mühit formalaşdırmaqdır.

Bu məqsədlərə daha effektiv şəkildə xidmət etmək üçün AFB-nin azərbaycan və ingilis dillərində hazırlanmış yeni rəsmi veb saytı – www.photographer.az bu gün ictimaiyyətə təqdim olundu.

Yeni sayt vasitəsilə istifadəçilər:

• AFB-nin fəaliyyəti və missiyası barədə ətraflı məlumat ala bilər,
• Fotoqrafiya kursları, ustad dərsləri, müsabiqələr və sərgilər haqqında məlumatları izləyə bilər,
• Fotoqalereya və arxivlə tanış ola bilər,
• Üzvlük və əməkdaşlıq imkanları barədə məlumat əldə edə bilər.

Yeni platforma AFB-nin üzvləri ilə əlaqəni gücləndirmək, daha geniş auditoriyaya çıxış imkanları yaratmaq və Azərbaycan fotoqrafiyasını beynəlxalq müstəviyə daşımaq baxımından mühüm addımdır.