Təhsil etibarilə həkiməm, lakin 2018-ci ildən etibarən peşəkar və yaradıcılıq yolum sıx şəkildə küçə fotoqrafiyası ilə bağlıdır. İstanbulda yaşayarkən şəhəri fotoaparatın obyektivi vasitəsilə araşdırmağa başladım, onun küçələrinin, ritmlərinin və insan hekayələrinin vizual kolleksiyasını topladım.

Fotoqrafiya fəaliyyətim əsasən küçə fotoqrafiyası və mobil fotoqrafiya janrlarında, mobil çəkiliş və linzalardan istifadə etməklə formalaşıb. Məni şəhər həyatının spontan anları, işıq və hərəkətin qarşılıqlı təsiri, eləcə də gündəlik həyatda üzə çıxan “gözə görünməyən” emosiyalar cəlb edir.

2020–2022-ci illərdə Türkiyədə peşəkar fotoqrafiya kursları keçmiş, daha sonra İstanbul Universitetində onlayn təhsil alaraq vizual dil, kompozisiya və sənədli fotoqrafiya sahəsində biliklərimi dərinləşdirmişəm.

Yaradıcılıq yolumun indiyədək olan kulminasiya nöqtəsi 2025-ci ilin oktyabrında İstanbulun Bakırköy Sərgi Mərkəzində keçirilmiş “Küçələrin melodiyası” adlı fərdi sərgim oldu. Ekspozisiya şəhərin vizual ritminə və küçə səhnələrində əks olunan çoxsəsliliyinə həsr edilmişdi.

2025-ci ildən etibarən Azərbaycan Fotoqrafları Birliyinin (AFB) üzvüyəm. Birliyin rəhbərliyinə göstərilən etimada və peşəkar fotoqrafiya icmasının bir hissəsi olmaq imkanına görə səmimi təşəkkürümü bildirirəm.

Tibbi təcrübəm vizual yanaşmama təsir göstərib — diqqətli müşahidə, empatiya və insan vəziyyətinə maraq mənim bədii dilimin ayrılmaz hissəsinə çevrilib.