Mən Fərhad, 1997-ci ildə Bakı şəhərində anadan olmuşam. Fotoqrafiya ilə ilk tanışlığım 2008-ci ildə bir SONY rəqəmsal kamera ilə baş verdi. Əvvəlcə ailəmizdə baş verən özəl günləri əbədiləşdirmək mənim üçün sadəcə bir hobbi idi. Zaman keçdikcə isə bu hobbi artıq həyatın içindəki özəl anları tutmağa olan bir ehtirasa çevrildi. Bir müddət sonra hiss etdim ki, həyatı sanki 35mm film kimi görürəm. Davamlı axan bir film və hər anı dəyərli edən səhnələr. Zövqüm isə bir küncə çəkilib bu axını müşahidə edərək, mənim üçün mənalı olan kadrları əbədiləşdirməkdən ibarət oldu. Uğurlu olub-olmadığımı demək mənə düşməz, amma ustadlardan aldığım dəyərli rəylər məni ilhamlandırır və gördüyüm işin dəyərini mənə xatırladır. Artıq 15 ildən çoxdur ki, fotoaparatım əlimdə “klikləyirəm” və bilirəm ki, hələ qarşıda kəşf ediləcək çox yer və əbədiləşdiriləcək sonsuz anlar var.