12 aprel 1990-cı ildə Neftçala şəhərində anadan olmuşam. Uşaqlıqdan incəsənətə meylli biri kimi böyümüşəm. Bu, özünü rəsm sahəsində daha çox büruzə verirdi. Orta məktəbdə çəkdiyim rəsmlər o vaxtkı “Günəş” jurnalında və “Tumurcuq” qəzetində dəfələrlə nəşr olunmuşdur. Eyni zamanda foto çəkməyə də maraq göstərirdim. Valideynlərimin mənə hədiyyə etdiyi “Wizen” markalı lentli fotoaparatla ilk kadrlarımı çəkməyə başladım. Zamanla fotoya olan marağım rəssamlıq sahəsini üstələdi və fotoqrafiya ilə daha ciddi məşğul oldum. Buna həm internetdə olan xarici fotoqrafiya kursu videoları, həm fotoqrafiyaya aid xaricidilli kitablar, həm də öyrəndiklərimi mütəmadi olaraq praktikada tətbiq etmək aiddir. Daha çox peyzaj və portret janrlarında fotolar çəkirəm. Təbiətin gözəlliyini və insanların üzündəki emosiyaları işıqlandırmağı sevirəm. Bir çox yerli və beynəlxalq fotomüsabiqələrin iştirakçısıyam. 2021-ci ildən Azərbaycan Fotoqrafları Birliyinin üzvüyəm. 2022-ci ildə “Mənim Dünyam” adlı fərdi sərgim keçirilmişdir. Fotoqrafiya həyatımın ayrılmaz bir hissəsidir və elə hesab edirəm ki, fotoarxivim davamlı olaraq yenilənəcək.