Mənim adım Əhməd Hatəmzadədir. Bakıdan olan fotoqrafam. Ən çox çəkdiyim və həvəslə yanaşdığım janrlar arxitektura, küçə fotoqrafiyası və minimalizmdir. Şəhəri öz baxış bucağımdan görməyi xoşlayıram — işıq, kölgə, xətlər və təsadüfi anlar vasitəsilə. Arxitektura mənim üçün sadəcə binalar deyil. Hər bir tikilidə bir ruh, bir ritm, bir hiss var. Mən tez-tez fasadları, detalları, əksləri çəkirəm — çalışıram məkanın xarakterini göstərim. Küçə fotoqrafiyasında isə mənim üçün təbii anlar vacibdir. Heç nəyə qarışmadan sadəcə müşahidə edirəm. Bəzən bir baxış, bir hərəkət, ya da divar fonunda bir siluet çox şey danışa bilir. Şəhər saysız-hesabsız hekayələrlə doludur və mən onların heç birini qaçırmaq istəmirəm. Minimalizm isə mənim üçün ayrı bir dil kimidir. Kadrda hər şey sadə olur, amma heç vaxt boş deyil. Böyük divar fonunda tək bir insan, bir pəncərə, ya da sakit bir işıq. Belə fotolarda çoxlu hava və dərinlik olur — izləyici özü mənanı tamamlayır. Mənim üçün fotoqrafiya — bir ifadə formasıdır. Mən sensasiya axtarmıram. Mən səs-küydə sakitliyi axtarıram. İstəyirəm ki, şəkillərim sadəcə gözə xoş gəlməsin, eyni zamanda içində bir hiss oyatsın. Çünki sadəlikdə də dərinlik var. “Photostock.az platformasında 100-dən çox fotoalbomum işıq üzü görüb. 2023-cü ildə isə ilin ən yaddaqalan kadrlarını seçən fotoqraflardan biri olmaq mənim üçün həm şərəf, həm də məsuliyyət idi.”