Arzu Mürvətova – 8 iyul 1989-cu ildə Bakı şəhərində anadan olub. 2007-2011-ci illərdə Azərbaycan Dövlət Mədəniyyət və İncəsənət Universitetinin Rəssamlıq fakültəsini fərqlənmə diplomu ilə bitirib. 2012-2014-cü illərdə isə təhsilini Azərbaycan Dövlət Rəssamlıq Akademiyasında magistr pilləsi üzrə davam etdirib. 2015-ci ildən Azərbaycan Dövlət Mədəniyyət və İncəsənət Universitetində çalışıb. 2018-ci ildən etibarənAkademiyanın doktorantura pilləsində təhsil alır.
2008-ci ildən fotoqrafiya sənəti ilə həvəskar olaraq məşğul olur və bir çox beynəlxalq, yerli müsabiqələrin iştirakçısı, qalibidir. 2010-cu ildə MDB ölkələri arasında keçirilən “Məndə sığar iki cahan…” adlı gənc rəssamların beynəlxalq internet müsabiqədə, 2012-ci ildə Tehranda keçirilən ECO I Beynəlxalq Vizual İncəsənət Festivalı çərçivəsində “Novruz Dünya Festivalı” adlı beynəlxalq internet müsabiqədə, Ukrayna Elisavetqrad qalereyasının təşkilatçılığı ilə “Bütün körpələr eyni dildə ağlayır və gülür” adlı beynəlxalq foto müsabiqədə, 2013-cü ildə “SAY CHEESE!” layihəsi çərçivəsində 6 ölkənin – Azərbaycan, Moldova, Ukrayna, Belarusiya, Gürcüstan və Ermənistanın iştirak etdiyi “PHOTOMAN 2013” adlı beynəlxalq foto müsabiqə və foto məktəbdə, Azərbaycan Fotoqraflar Birliyi və YARAT Müasir İncəsənət Məkanının təşkilatçılığı ilə “ЗАВОД” adlı layihədə, Türkdilli dövlətlərin gənclərinin Bakı Beynəlxalq Yaradıcılıq Festivalı çərçivəsində keçirilən müsabiqədə, 2014-cü ildə Belqrad SMEDEREVO Mədəniyyət Mərkəzi və Foto Məktəbinin təşkilatçılığı ilə “SMEDEREVO 2014” beynəlxalq foto müsabiqədə, Ukrayna Rəssamlar İttifaqının təşkilatçılığı ilə “Dünya uşaqları” V beynəlxalq foto müsabiqədə, Özbəkistan Rəssamlıq Akademiyasının təşkilatçılığı ilə VII Daşkənd Foto Biennalı çərçivəsində “Uşaqlıq ərazisi” beynəlxalq müsabiqədə, MİRAS Mədəni İrsin Öyrənilməsinə Kömək İctimai Birliyi və Makedoniya Sosial-Mədəni Antropologiya İnstitutunun təşkilatçılığı ilə“Azərbaycanın arxeoloji inciləri” beynəlxalq foto müsabiqədə, 2016-cı ildəAzərbaycan Fotoqraflar Birliyi və Moskva Azərbaycanlılarının Milli-Mədəni Muxtariyatının təşkilatçılığı ilə keçirilən “Azərbaycan multikulturalizm ölkəsidir” adlı beynəlxalq foto müsabiqədə və digərlərində I, II, III yer üzrə diplom və mükafatlara layiq görülüb.
Həmçinin 2010-cu ildə Marmara Universitetinin təşkilatçılığı ilə “V Beynəlxalq Tələbə Triennalı”nda, 2016-cı ildə Sille Sanat Sarayının təşkilatçılığı ilə “İslam dünyası paytaxtı Konya” layihəsi çərçivəsində 30 islam ölkələri fotoqraflarının görüşündə, 2017-ci ildə Azərbaycan Fotoqraflar Birliyi və Gürcüstan Fotoqrafları Assosiasiyasının təşkilatçılığı ilə “Azərbaycan Fotoqrafiyası günləri”ndə ölkəmizi layiqincə təmsil edib.
2017-ci ildə isə Ukraynanın paytaxtı Kiyev şəhərində keçirilən “ГаШоТю” IV Beynəlxalq Komediya Sənəti Festivalına fəxri qonaq qismində dəvət alıb və “Məzəli foto” nominasiyası üzrə III yerə layiq görülüb.
Türkiyəli fotoqraf Alahattin Kanlıoğlunun, gürcüstanlı fotoqraf Quram Tsibaxaşvilinin, fransalı fotoqraf Alain Zimerayın və rusiyalı fotoqraf İlya Raşapın ustad dərslərinin iştirakçısı olub. 2013-cü ildən etibarən MİRAS Mədəni İrsin Öyrənilməsinə Kömək İctimai Birliyinin, 2014-cü ildən Azərbaycan Rəssamlar İttifaqının, 2016-cı ildən isə Azərbaycan Fotoqraflar Birliyinin üzvü, Təşkilat Komitəsinin qəbul üzrə koordinatoru və afb_photograper.az rəsmiinstagram səhifəsinin adminidir.
