26 iyun – Azərbaycan Respublikası Silahlı Qüvvələri Günü münasibətilə Azərbaycan Respublikası Mədəniyyət Nazirliyi və Azərbaycan Fotoqrafları Birliyinin birgə təşkilatçılığı ilə Ağstafa şəhərindəki Heydər Əliyev Mərkəzində “Zəfərin ruhu” adlı foto sərgi keçirilib.

Sərgi Azərbaycanın hərbi gücünü, əsgər ruhunu və vətənpərvərlik dəyərlərini əks etdirən fotoşəkillərlə tamaşaçılara unudulmaz emosiyalar yaşadıb. Ekspozisiyada həm peşəkar, həm də istedadlı gənc fotoqrafların çəkdiyi fotolar nümayiş etdirilib. Əsərlər Silahlı Qüvvələrimizin qəhrəmanlığını, zəfər yolunu və əsgər həyatı ilə bağlı unikal anları sənədli vizuallarla təqdim edib.

Tədbirdə Ağstafa Rayon İcra Hakimiyyətinin başçısı Seymur Orucov, Azərbaycan Respublikası Mədəniyyət nazirinin müavini Murad Hüseynov, eləcə də bir sıra dövlət rəsmiləri, mədəniyyət və ictimaiyyət nümayəndələri iştirak ediblər.

Sərgi çərçivəsində çıxış edən qonaqlar Vətən müharibəsində qazanılmış tarixi zəfərin sənət vasitəsilə ifadə olunmasının əhəmiyyətini vurğulayıb, bu tip layihələrin gənc nəslin milli ruhda formalaşmasında mühüm rol oynadığını qeyd ediblər.

“Zəfərin ruhu” sərgisi vətənpərvərlik mövzusunda həyata keçirilən bədii və sənədli foto layihələrə marağın artdığını göstərməklə yanaşı, fotoqrafiyanın cəmiyyətə təsir gücünü bir daha ortaya qoydu.